Түлектер үлкен үмітпен болашаққа аттанды

Кеше елордада Орталық саябақтағы амфитеатр алаңында өткен мектеп түлектеріне «Алтын белгі» төсбелгілерін тапсыру салтанаты өтті. Оған қала әкімі Алтай Көлгінов қатысып,  түлектерді құттықтады. Биылғы жылы Нұр-Сұлтанда 7471 түлек мектеп бітірсе, оның ішінде 403 оқушы «Алтын белгі» иегері атанды, ал 367 оқушы үздік аяқтады.

Салтанатты кеште жас түлектерді өнер жұлдыздары да құттықтап, әннен шашу шашты.

Түлектерге арналған салтанатты кездесу туралы Нұр-Сұлтан қаласының әкімі Алтай Сейдірұлы өзінің әлеуметтік желідегі парақшасында былайша жазба қалдырды:

«Мектеп түлектерінің алдына бұдан да анағұрлым маңызды мақсаттар қоятын кез келді. Олардың өмірінің жаңа кезеңі басталуда. Бұл, расында, толғанысқа толы әрі жүрегің тулап, қобалжитын сәт. Жастардың көбі қазірден-ақ ұнайтын мамандықтарын таңдап қойды және сол жолда мақсаттарына қадамдап жететін болады.

«Алтын белгі» иелерін құттықтадым. Олардың саны – 403 оқушы. Одан бөлек, 367 оқушы мектепті үздік аяқтады. Бұл оқу жылы бәріне оңай тиген жоқ, соған қарамастан біздің оқушылар республикалық олимпиадалар мен байқауларда, соның ішінде халықаралық деңгейде де 1400 медальді жеңіп алды. Елорданың құрама командасы осымен 14-інші жыл қатарынан жалпы командалық есепте 1-орынды және «Үздік олимпиадалық команда» атағын алды. Мұның бәрі – біздің оқушылар мен мұғалімдердің және ата-аналардың қажырлы еңбегі мен жаңа білім алуға деген талпынысының, ниетінің арқасы.

Әр түлек мақтауға лайық. Мектеп сіздерге болашақтарыңыз үшін азық болар білім берді. Өмірлеріңіздің жаңа кезеңіне сіздер білімнің мол қорымен аяқ басып отырсыздар.

Әрі қарай алдарыңыздан талай асу шығады! Әлі алда көп оқып, жаңа машықтар мен білімді меңгерулеріңіз керек. Талай белесті де бағындырасыздар, бірақ жолыңызда кедергілер де кездесетін болады. Сондықтан ең бастысы – өздеріңізге және өз күшіңізге деген сенімді жоғалтпау. Ештеңе де оңайшылықпен келмейді, тек маңдай тер мен терең білімнің арқасында діттеген ойларыңызға жетіп, өз еліңіз бен қалаңыздың лайықты азаматтары бола аласыздар.

Мемлекет тарапынан сіздердің сапалы білім алып, жайлы жерде оқуларыңыз үшін барлық жағдай жасала береді.

Ал біздің елордамыз сіздердің ең бір батыл бастамаларыңызды жүзеге асыратын, болашақ мықты мамандық иелері болуларыңызға даңғыл жол ашатын астана болып қала береді» деп жазды қала әкімі.

Дамир Пернебеков, «Алтын белгі» иегері:

– Алдымен ата-анама, мектептегі ұстаздарыма, ағайларыма, апайларыма алғысымды айтамын. Оқуға Астана медициналық университетіне түсіп, кардиохирург мамандығын меңгеріп, еліме, халқыма өз көмегімді тигізсем деймін.

Ақбота Арманқызы, «Алтын белгі» иегері:

– Бүгін «Алтын белгі» иегері атанып жатырмын. Өзімнің ата-анама, ұстаздарыма үлкен алғысымды айтамын.