Пара жүзуден елордалық азамат алтын медаль еншіледі

Португалияның Мадейра аралында өткен пара жүзуден Еуропа чемпионатында алтын медаль еншілеген елорда тұрғыны Сиязбек Далиевті Нұр-Сұлтан қаласының әкімі Алтай Көлгінов қабылдады.

Бұл туралы Алтай Сейдірұлы өзінің әлеуметтік желідегі жеке парақшасында жазба жариялады.

Ол баттерфляй стилінде 50 м қашықтықты 35,7 секундта жүзіп өтті.

Сиязбек – пара жүзуден халықаралық дәрежедегі спорт шебері, 2018 жылғы Азия ойындарының пара чемпионы, 2019 жылы Лондонда өткен паралимпиадалық жүзуден әлем чемпионатының финалисі.

Қазір ол балаларды оқытады, балалар-жасөспірімдер спорт мектебінде, ерекше қажеттілігі бар спортшыларға арналған спорт мектебінде еңбек етіп, өз тәжірибесімен бөліседі.

Елордада оңалту орталықтары желісін кеңейту бойынша жүйелі жұмыстар жүргізіліп жатыр.

Қалада халықаралық деңгейдегі мамандандырылған паралимпиадалық жаттығу орталығы жұмыс істейді. Ерекше қажеттілігі бар тұрғындар үшін тегін. Орталықта спорттың 17 түрі бойынша жаттығулар өткізіледі, 3,5 мың адамды қамтуға жағдай жасалған. Сонымен қатар, ерекше қажеттілігі бар адамдар үшін спорт кешенін саламыз. Онда келесі пәндерді енгізуді жоспарлап отырмыз: көру қабілеті бұзылған балаларға арналған футбол, арбадағы баскетбол, арбадағы регби және т.б. Қазіргі уақытта жобалау-сметалық құжаттаманы әзірлеу бойынша жұмыстар жүргізіліп жатыр.

Осы жылдың бірінші жартысында көру қабілеті бұзылған балаларға арналған мамандандырылған балабақша ашамыз. Мекеме 90 орынға есептелген, Сарыарқа ауданында орналасқан (Кенесары көшесі, 9/1).
Тек өткен жылдың өзінде «Асыл мирас», «Erekshe balalar», «Орда», «Қамқорлық» сияқты бірқатар ірі оңалту орталықтары ашылды.

Әр жеңіс күш-жігерді, үнемі жаттығуды, дайындықты талап етеді. Спортшыларымыздың ерік-жігері жастарға үлгі болса, олардың жоғары жетістіктері еліміздің әлемдік аренадағы беделінің нығаюына септігін тигізіп келеді. Өз тарапымыздан спортпен айналысу үшін бұдан әрі де қолдау көрсетіп, жағдай жасаймыз, – деп жазды Алтай Сейдірұлы.