Jastar janary Ұлттық, қоғамдық-мәдени ақпараттық порталы
Ойынның да, әзілдің де естісі мен есері болады. Бүгінде қалжыңға, әжуа мен алдауға құрылған пранк түрлері көбейе түскен. Міне, осы пранк қоғамды алаңдатқан мәселеге айнала бастағаны жасырын емес. Ойнаймын деп от басып жүрген жастарымыздың қатары артуда.
Енді осы «пранк» мәселесі Мәжіліске де жетіп, Парламент депутатының назарына ілікті. Мәжіліс депутаты Нартай Сәрсенғалиев қоғамда белең алып кеткен орынсыз пранк жасап, арзан әзіл, парықсыз әрекетпен адамның жеке өміріне қол сұғып, қоғамдық тәртіпті бұзып жүрген жүрген кейбір блогерлердің әрекетіне тосқауыл қою мәселесін көтерді.
– Бүгінгі депутаттық сауалым «Ойын түбі — от, тұман түбі — жұт» дегенді санасына сіңірмеген селтеңбайлар туралы. Қазір қоғамда пранкпен парақшасындағы лүпілдің санын арттырғанмен парасат биігінен омақаса құлағандар қаптап кетті. Адамды қорқытуды, қоғамдық орында ақымақтық жасауды қызық көріп әзілдің шекарасынан шығып кеткен әркімдер әлеуметтік желіде әлек салуды доғармай тұр, – деді Нартай Аралбайұлы.
Ары қарай сөзін нақты мысалдармен жеткізген депутат жан түршіктіретін жайттардың да орын алып жатырғанына тоқталды.
– Біріншісі, Астана қаласында блогер достарымен бірге лифттің ішіне «жалған мәйітті» кіргізіп, кейін жарықты өшіреді. Сол сәтте мәйіт кейпіндегі адам қозғала бастайды. Жеделсатының ішінде болғандардың жан даусы шықты. Екінші, Елорданың тағы бір тұрғыны жеделсатыға тапаншамен кіріп, оны адамдарға кезеп жұрттың зәре-құтын алды. Үшінші, Алматыда блогерлер аула сыпырушыларға қоқыс лақтырып, мазақ етіп бейнежазба түсіріп таратты. Мұндай мысал мың. Желіге желімдей жабысқандар «пранк» деп атайтын бұл әрекеттердің ақылға томпақ екенін аңғару қиын емес, – деді.
Фото: pro-promotion.ru
Блогер ретінде танылып жүрген кейбір жастардың ерсі қылықтары тіпті өз елімізден асып, шет мемлекеттерде де бой көрсете бастағаны да халық қалайлысының назарынан тыс қалмады. Осы жағдайларға қатысты өзінің сын-пікірін айтқан Нартай Аралбайұлы:
– Ол ол ма, біздің блогерсымақтар шетелге барып абыройды айрандай төгіп жүр. Мәселен, қазақстандық блогер Аружан Айбекова Қытайда «ұрлық жасап жатқандай» ролик түсірген. Арты үлкен шу болып, ақыры әлгі қыз жергілікті полицияға шақырылды. Түсіндіру жұмыстары жүргізілді. Бірақ ол түсінді ме? Өйткені дәл осы блогердің арада аз уақыт өткенде Ташкент метросында жігіттердің қолынан ұстап тиіскені туралы бейнежазба тағы тарады. «Ойыннан да омыртқа 2 сынатынын» білмейтін мұндай блогер-сымақтарды қатаң жауапқа тартатын кез келді. Себебі бұл адамның жеке өміріне қол сұғу, қоғамдық тәртіпті бұзу. Қазір пранк деген парықсыз әрекеттің тағы бір түрі пайда болды. Ол жасанды интелекпен жасалады. Бірінде мемлекет басшыларының, лауазымды тұлғалардың қандай да бір дүкенге сауда жасауға келгені бейнеленген. Цифрлық технологияны білмейтін адамның санасы сан саққа жүгіреді, сеніп қалады. Маркетинг үшін деп жасанды интелект арқылы мұндай жасандылыққа жүгінуді тоқтату керек. Тағы бір пранкте балалар ата-аналарына «танымайтын адам үйге келіп тұр, не істейміз?» деп жасанды интелект арқылы беймәлім адамның үйге кіріп кеткен, пәтерді аралып жүрген суреттерін жібереді. Зәресі ұшқан ата-ана полицияға телефон шалады, жұмысын тастап үйіне барады. Ақырында бұл пранк деп бала-шаға бейқам отырады. Дәл сол уақытта полиция шын мұқтаж адамға көмекке баруға үлгермей қалуы мүмкін, оны интернеттің инесіне отырғандар ұқпайды. Ол ол ма, жуырда бір блогердің тірідей табытқа жатып, өзін көміп, «24 сағат табытта» атты челлендж бастағанын қоғам қатаң сынға алды, – деп елді елең еткізерлік мысалдар келтіріп, блогерлерді қатаң сынға алды.
Осы мәселелерді алға тартқан депутат өз ұсыныстарын да жеткізді.
– Хәкім Абай: «Ішпек, жемек, кимек, күлмек, көңіл көтермек – бұл нәрселердің бәрінің де өлшеуі бар. Өлшеуінен асырса, зияны тимек» деген уағында. Сондықтан өлшемге өресі жетпейтіндерді заңмен тұсайтын кез келді. Осыған орай мынадай ұсыныстарды қарау орынды деп санаймын:
1. Пранк барысында қоғамдық тәртіпті бұзған, жеке адамның өміріне қол сұққандарды анықтап, олардың бірыңғай тізімін жасап жариялау қажет.
2. Қауіпті пранк арқылы адамның ар-намысы мен абыройына қол сұққандардың әлеуметтік желідегі парақшаларын дереу бұғаттау керек;
3. Әлеуметтік желі әкімшілерінен қауіпті пранктер мен бейнежазба жарияланған парақшаларды анықтап, уәкілетті органға жедел хабарлауды талап ету қажет;
4. Мұндай теріс құбылыстың алдын алу мақсатында ақпараттық-түсіндіру жұмыстарын жүйелі түрде, нәтиже беретін контент ретінде жүргізу керек, – деді Мәжіліс депутаты Нартай Сәрсенғалиев.
Посмотреть эту публикацию в Instagram
