Jastar janary Ұлттық, қоғамдық-мәдени ақпараттық порталы
Елордада биыл 1900 орынға арналған 5 студенттік жатақхана пайдалануға беріледі. Ал 2025 жылға дейін жеке инвесторлар мен жоғары оқу орындарының меншікті қаражаты есебінен 11 мыңға жуық орындық студенттер үйі қолданысқа берілмек. Ғылым және жоғары білім министрлігі, Астана әкімдігі, «Қаржы орталығы» АҚ және бірқатар ЖОО инвесторлармен студенттік жатақханалар салу бойынша ынтымақтастық орнату туралы меморандумдар жасасты.
Студенттік жатақханалар салу бойынша арнайы жобалық кеңсе ашылды. Жобалық кеңсе жатақханалар салу жөніндегі мемлекеттік бағдарламаны жүзеге асыруды, студенттерді тұрғын үймен қамтамасыз етуді жүзеге асырады. Аталған кеңсенің ашылуында Ғылым және жоғары білім министрі Саясат Нұрбек пен Астана қаласының әкімі Жеңіс Қасымбек құттықтау сөз сөйледі. Елорда әкімі Жеңіс Қасымбек әкімдік тарапынан жатақхана құрылысына қажетті жер учаскелері бөлініп, әкімшілік мәселелер бойынша көмек көрсететінін жеткізді.
«Елордаға оқуға келетін студенттер саны жыл сайын артып келеді. Қалада 15 жоғары оқу орны бар, онда 67 мыңға жуық студент оқиды. Олардың бір бөлігі бұл қаладан емес. Жауапты министрлікпен бірлесіп инфрақұрылымды құру бойынша жұмыс жүргіземіз. Бұл жұмыс инвесторларды да, жоғары оқу орындарын да жұмылдыра отырып жүргізіледі. Біз өз тарапымыздан жер учаскелері мен әкімшілік мәселелер бойынша көмек көрсетеміз», – деді қала әкімі Жеңіс Қасымбек.
