Нұртөре ЖҮСІП, Парламент Сенатының депутаты: Отбасы тәрбиесі мен мәдени тәрбиеге күш салу қажет

Сенат отырысында Сенатор Нұртөре Жүсіп Қазақстан Республикасының Премьер-Министрі Ә.Смайыловтың атына депутаттық сауал жолдады.

Депутаттық сауалында Нұртөре Байтелесұлы ұрпақ тәрбиесімен қатар, мәдениеттілік мәселесін де алға тартып, оны көтеру ісіне де жіті назар аудару керектігін айтқан.

«Қазақта «Қазаннан қақпақ кетсе, иттен ұят кетеді» деген сөз бар. Былтыр Тәжікстанның жеміс-жидегіне таласқан жұртты көріп жағамызды ұстаған едік. Дәл жаңа жылдың алдында шоколад шыршасын бір минутта тайпап кеткендерді де көрдік.

Осы видеолар халықаралық пабликтерде мыңдаған қаралым жинап жатыр. Сонда біздің мәдени деңгейіміз, жеткен жеріміз осы ма? Мұндай масқара оқиғалардың себебіне үңіліп көрдік пе? Аш дейін десеңіз, аш емес. Тоқ дейін десеңіз, тобырлық деңгей мынау. Бүгінгідей тоқшылық заманда осыншама тоғышарлыққа бой алдыратындай күйге неге түстік?

Ең алдымен – тәрбие! Біздің елдегі тәрбие мәселесі дұрыс емес. Отбасындағы тәрбие далада қалды. «Біреудің бір затын алма, тегін болса да тиіспе» деген ежелгі тыйым қайда кетті? Халқымыздың «Ұят болады, Жаман болады, Обал болады» деген үш-ақ ауыз сөзбен түйіндеген даналығы желге ұшқаны ма?

Қазақта «көргенсіз» деген ұғым бар. Кез келген адам үшін өте ауыр сөз. Ақ көйлектің жағасы кірлесе, жуып кетіруге болады. Ал Ұлттың атына кір келсе, қалай кетіреміз?

Тәрбиемен қатар мәдениет дұрыс болуға тиіс. Абайша айтсақ, «Мәдениетсіз – дүние бос!».

Тәуелсіздік жылдарында Мемлекет мәдени деңгейімізді көтеруге, таным-түсінігімізді кеңейтуге бағытталған бірқатар жұмыстарды жүргізді. «Мәдени мұра» бағдарламасымен басталып, «Рухани жаңғыру» бағдарламасына дейін жалғасқан жұмыстардың барлығының да түпкі мақсаты елдік санамызды оятып, тарихи жадымызды қайта қалпына келтіруді көздеді. Мұның бәрі дұрыс. Елдің дамуы үшін қажет шаралар. Сонымен іс бітті деп отырамыз ба?

«Әділетті Қазақстанның» құндылықтары қандай? Қоғам үшін қандай құндылықтар керек?

Айталық, Тәуелсіздік – құндылық. Отбасы – құндылық. Жер, тіл, салт-дәстүр, мәдениет – құндылық!

Президент «Толық адам», «Адал азамат» деген идеяларды ұсынды. Бұл да құндылық. Осының бәрін кім жүйелейді? Айтылған сөз айтылған жерде қалмауы керек қой.

20 миллион Қазақ еліне ортақ осындай құндылықтар жүйесі қашан жасалады?

Жас ұрпақ тәрбиесі мен мәдени деңгейімізді көтеру мәселесіне мұқият көңіл бөлмесек болмайды. Жабайылық – анайылыққа жол ашады.

Сондықтан жалпы халықтың, әсіресе жастардың құндылық бағдарларын тереңдетіп, жұртты еңбекқорлыққа, ізденіске, ілім-білімге бет бұруға, әсіресе отбасы тәрбиесі мен мәдени тәрбиеге барынша күш салу қажет деп пайымдаймын» дей келе, аталған мәселеге қатысты Үкіметтің тұжырымдамалық ұсыныстарын жан-жақты пысықтап, жедел әзірлеуге тапсырма беруін сұраған.

«Қазақстан Республикасының Парламенті және оның депутаттарының мәртебесі туралы» Қазақстан Республикасы Конституциялық Заңының 27-бабына сәйкес, Сізден, жоғарыда көтерілген мәселелер бойынша толық жазбаша жауап беруді сұраймын» дейді сенатордың депутаттық сауалында.