Jastar janary Ұлттық, қоғамдық-мәдени ақпараттық порталы
Мәжіліс депутаты, «AMANAT» партиясы фракциясының мүшесі Жарқынбек Амантайұлы елімізде жыл сайын бір қаланы «Қазақстанның кітап астанасы» деп жариялау туралы бастама көтерді. Бұл ұсынысты ол Премьер-Министрдің орынбасарына жолдаған депутаттық сауалында атап өтті.
Депутаттың айтуынша, бұл бастама кітап оқу мәдениетін дәріптеуге, әдебиеттің қоғамдағы рөлін арттыруға және зияткер ұлт қалыптастыруға үлкен серпін береді. ЮНЕСКО-ның «Дүниежүзілік кітап астанасы» тәжірибесін мысалға келтіре отырып, ол бұл дәстүрді Қазақстанда да енгізудің уақыты келгенін атап өтті.
«Кітап астанасы» эстафетасын Ұлттық кітап күнімен үйлестіре отырып, ауқымды рухани-мәдени бастамаларды, түрлі деңгейдегі байқауларды ұйымдастыруға толық мүмкіндік бар. Бұл бастама Ұлттық кітап оқу күні мерекесінің философиясымен толықтай үндес және өзара сабақтас болып табылады, әрі Президент тапсырғандай, атаулы күннің мән-маңызын айтарлықтай арттыра түсері сөзсіз.– деді Жарқынбек Амантайұлы.
