«Елім менің» коалициясының мүшелері еркін пікір алмасты

Қазақстан Президенті мемлекеттік тілді реформалау рухани жаңғыру бағдарламасы аясындағы маңызды мәселелердің бірі екенін атап өтті. Бұл  күндері қазақ тілінің жаңа әліпбиіне байланысты мәселе қоғамда қызу талқылануда. Осы орайда, Батыс Қазақстан облыстық жастар саясаты мәселелері басқармасының қолдауымен «Жас Отан» Жастар қанаты БҚО филиалының ұйымдастыруымен «Еркін пікір» дискуссиялық клубының кезекті отырысы өтті.

«Еркін пікір» дискуссиялық клубы» – бұл барлық қатысушылардың өз пікірлерін ортаға салып, көзқарастарын білдіруге мүмкіндік жасайтын алаң.
Еркін алаңға облыстағы тіл өкілдерінің мамандары, журналистер мен жастар ұйымдарының өкілдері, сонымен қатар «Елім менің» коалициясының мүшелері қатысты.

Еліміз тәуелсіздік алған кезден туындаған латын қарпіне көшу туралы идея туралы тіл мамандары өз ойларын білдірді. Жастар болса қазіргі таңда қоғамның бастаушысы ретінде жаңа стандарттартты еркін меңгерудің жолдарын ұсынып, сәйкесінше субъективті жеке пікірлерін білдіріп, ал IT саласының мамандары әлеуметтік желілер мен техникалық құрылғыларда болатын өзгерістер туралы ой қозғады.

Дискуссиялық клубтың басты қонағы Халықаралық «Қазақ тілі» қоғамы Батыс Қазақстан облыстық филиалының төрағасы Болат Жексенғалиев:

– Сөз жоқ, Елбасының биылғы жылға арнаған бағдарламасы – ел дамуының тұтас бір кезеңінде біз басшылыққа алатын ұстанымдар мен тұжырымдар жинақталған, ел ертеңіне, ұлт болашағына деген сенімді күшейте түсетін тарихи құжат. Латынға көшудің уақыты туды.

Маңыздылығы, қажеттілігі жағынан, мүмкін тілдің бүгіні ғана емес, болашағы үшін де бірегей, басты мәселе – ұлттық әліпби туралы бағдарламада айтылған тиянақты ой – қоғамда үлкен қызығушылық тудырды, өйткені әліпби тақырыбы ұлт зиялыларының көптен күткен әңгімесі еді, – деп атап өтті.

Қажығалиева Тұрсынай, «Елім менің» коалициясының мүшесі: «Латын әліпбиіне көшу секілді маңызды мәселелердің халыққа түсінікті болуы, әрі жылдам таралуы жастарға тікелей байланысты. Мен де жаңа әліпбиді қолдаймын. Бүгінгі еркін алаңда көптеген ұсыныстар айтылды. Жаңа әліпбиді халыққа тез сіңіру жөніндегі тың ойларымызбен бөлістік. Осы алаңға келген жастардың көпшілігі бұл мәселені түсінген және оны қолдауға дайын екендігін білдірді».

Отырыс қорытындысы бойынша әлеуметтік желілердегі топ атаулары мен қолданушы атауларын латын әріптеріне ауыстыру, офлайн режимде қызмет ететін ыңғайлы конвертер ойлап табу, жас тіл мамандарының ұсынысымен жастар мен үлкен топтарды оқытатын арнайы кешенді курстар жүргізу бастамасы көтерілді.