Жыр алыбы Жамбылға арналған аламан айтыс өтті

Аламан айтықса Мұхтар Ниязов, Жансая Мусина, Рүстем Қайыртай, Батыржан Кәдірбай, Қалижан Білдәш, Шұғайып Сезімхан, Нұрзат Қару, Серік Қуанған, Рауан Қайдар, Мұхтар Қонарбай, Әсет Дүйсебаев, Нұрлыбек Құрманов, Рай Дөңбай сынды аузы дуалы ақындар қатысып, бақ сынады. Мемлекеттік тілдің мәртебесін арттыру мақсатында ұйымдастырылған аламан айтыста ақындар елдің жайын жырлап, ұлттық құндылықтарымызды ұлықтады. Сондай-ақ қоғамдағы түрлі оқиғалар мен елдік мәселелерді арқау етіп, сөз сайысының көрігін қыздырды.

Нәтижесінде, бас жүлдені Серік Қуанған (Шығыс Қазақстан облысы) еншіледі. Ал 1-орынға Мұхтар Ниязов (Қызылорда облысы) лайық деп танылды. Бұл ретте, 2-орынды Жансая Мусина (Батыс Қазақстан облысы) қанжығасына байлады. Осы орайда, 3-орынды Мұхтар Қонарбаев (Астана қаласы) иеленді. Бұдан бөлек, Әсет Дүйсебаевқа (Жамбыл облысы) – «Ұлбике ақын», Рүстем Қайыртайға (Абай облысы) – «Кенен Әзірбаев», Шұғайып Сезімханға (Алматы) – «Бауыржан Момышұлы» және Рауан Қайдарға (Павлодар облысы) – «Әзімбек Жанқұлиев» атындағы арнайы жүлделер табысталды.

Айтыс тізгінін ұстаған Мәжіліс депутаты, ақын Аманжол Әлтай дәстүрлі доданың жоғары деңгейде өткенін атап өтті.

«Бұл айтыста ұланғайыр даламыздың төрт құбыласын түгендеп, еліміздің түкпір-түкпірінен келген айтулы ақындар бас қосты. Айтыс – қазақ халқының ұлттық ерекшелігін айқындайтын бекзат өнер. Топқа түскен ақындар Жамбыл атамыздың болмысын жырлап қана қоймай, қоғамдағы күрделі мәселелерді де қозғап, көзіқарақты көрерменнің көңілінен шыққан орамды ой айта білді», – деді Аманжол Әлтай.

Фотосуреттер: https://t.me/AMANATPartiyasy