«Аялаған Астана»: елорданың 25 жылдығына орай гала-концерт өтті

Астана қаласы әкімдігінің қолдауымен ашық аспан астында ұйымдастырылған гала-концертте «Аялаған Астана» республикалық конкурсының бүгінге дейінгі жылдардағы қатысушылары өнер көрсетті.

Аталған конкурс алғаш рет 2013 жылы басталған, 10 жылдан бері өнерпаздар қанатын қомдап ұшатын ыстық ұяға айналды.
Байқауда 8 жастан 12 жасқа дейінгі балалар эстрадалық вокалдан бақ сынады. Іріктеу кезеңі аймақтарда болады, кейін финалда жеңімпаздар анықталады. «Аялаған Астананың» жеңімпаздарының қатарында Болат Батырбаев, Мұхамедали Жүгінісов, Данелия Төлешова, Жәнел Садуақас және басқалары бар. 

«Музыкалық телевизиялық байқауға 10 жыл болды. Біз осы гала-концертте барлық жылдардағы қатысушыларды, оның ішінде жеңімпаздарды жинауға тырыстық. Бүгінгі концертте Ержан Мақсұм өнер көрсетті, бірақ ол конкурстың қатысушы емес.
Қатысушылардың арасында әнші Садраддин де бар. Биыл да еліміздің түкпір-түкпіріндегі жас таланттарды жинап, елордада өнерлерін ортаға салдық. Міне, Елорда күніне орай осындай таланттарымыз қала тұрғындары мен қонақтары үшін әннен шашу шашады», – деді осы гала-концерттің қоюшы режиссері Саян Мырза.