Қазақ жігіті АҚШ-тағы әйгілі телеарнаның басшылық қызметіне тағайындалды

Жақында белгілі қазақ журналисі Талғат Алманов Нью-Йорктің әйгілі ABC 7 (Буффало) телеарнасына Executive Reporter қызметіне тағайындалды.Ол Нью-Йорк университетінде журналистика мамандығын меңгерген. Кейін Джорджия штатындағы Atlanta News First телеарнасында журналист әрі продюсер болып қызмет атқарды. Сондай-ақ, бұған дейін мемлекеттік телеарнаның бірінің АҚШ-тағы меншікті тілшісі болған.

Қазақ журналисінің негізгі міндеті – редакция жұмысын ұйымдастыру, әзірленетін материалдардың сапасын бақылау және жаңалықтардың көрерменге дер кезінде ұсынылуын қамтамасыз ету. Яғни, мұхиттың арғы жағындағы ірі жаңалықтар бөлімінің жұмысын бақылап, америкалық журналистер мен продюсерлер тобымен тығыз жұмыс істейтін болады.

АҚШ телеарнасында ақпараттық қызметке жетекші ретінде тағайындалған тұңғыш қазақстандық маман басшылық қызметпен қатар зерттеу журналистикасымен белсенді түрде айналысып, көрермендерге сапалы репортаждар ұсынуды да жалғастырады.

Осы қуанышты жаңалығымен бөліскен журналист:

Ол журналистикадағы алғашқы қадамдары, Нью-Йоркте білім алуы, АҚШ медиасындағы мансабы және америкалық редакцияның жұмыс ерекшеліктері туралы ZTB редакциясына сұхбат беріп, шетелде кәсіби жолын қалыптастырудағы қиындықтар туралы да айтқан.

Журналистің пікірінше, жаңа ортаға бейімделу, ағылшын тілін меңгеру, кәсіби байланыс орнату және бәсекеге дайын болу маңызды. Сондай-ақ ол Қазақстандағы жас журналистерге кеңес беріп, АҚШ медиасында жұмыс істеуді армандайтындарға неден бастау керегін түсіндірді.

Жас маман студент кезінен жаңалықтар саласында жұмыс істеуді, әсіресе дикторлыққа қызығатынын қалағанын айтты.

«Студент кезімнен жаңалықтарда жұмыс істегім келетін. Әсіресе, дикторлыққа қызығатынмын. Алланың қалауымен студенттік шағымда «Азамат» пікірсайыс бағдарламасына қатысып, көп ұзамай телеарнаға жұмысқа шақырту алдым.

Диктор болып екі жылдан астам уақыт жұмыс істегеннен кейін интеллектуалдық және кәсіби тұрғыда бір орында тұрып жетілдіргім келді. Сол себепті АҚШ-қа барып, халықаралық тәжірибе жинау туралы ойлана бастадым», – дейді журналист.

Фото: Талғат Алмановтың инстаграм арнасынан

Оның осы арман-мақсаты бәсекелістік үлкен АҚШ секілді алып державада білім шыңдап, кәсіби еңбек жолын жалғастыруына, бүгінгідей жетістікке жетуіне жетелесе керек.

«Ол кезде Қазақстанда халықаралық деңгейде тәжірибе жинаған журналистер көп емес еді. Көбіне Ресей мен Украинадан мамандар шақырып, шеберлік сабақтарын өткізетін. Ал мен әлемдік деңгейдегі журналистермен бір ортада жұмыс істеп, солардың тәжірибесін үйренуді армандадым.

Осы арман мені АҚШ-қа алып келді. Журналистика бойынша әлемнің ең үздік универлерінің бірі саналатын Нью-Йорк университетіне (NYU) журналистика мамандығына оқуға түстім. Бәлкім, дәл осы шешім менің кәсіби өмірімдегі ең маңызды бетбұрыстардың бірі болған шығар», – деп еске алды Алманов.

Нью-Йорк сияқты бәсекесі жоғары қалада ABC7 телеарнасында басшылық қызметке дейін жетуіңізге қандай мүмкіндіктер мен шешімдер әсер еткені туралы ол:

«Ең алдымен, өзімізге сенуіміз керек деп ойлаймын. Қазақ жастарының арасында шетелдіктерден өзімізді төмен санау немесе олардың деңгейіне жете алмаймыз деген түсінік қалыптасқан сияқты. Барлығы емес, әрине, бірақ ондай пікірлердің естілетіні рас. Мен бұған келіспеймін. Біздің жастардың қабілеті де, білімі де, әлеуеті де ешкімнен кем емес. Ең бастысы – өзіңе сеніп, сол мақсатқа жету үшін жүйелі түрде еңбек ету. Мысалы, АҚШ-қа келгеннен кейін қыдырыстарды қойып, бар фокусымды білім алып, ағылшынымды жетілдіруге жұмсадым. Әсіресе, журналистикада ағылшын тілінде сауатты жаза білу өте маңызды», – дейді журналист.