Jastar janary Ұлттық, қоғамдық-мәдени ақпараттық порталы
Күні кеше Тайланд елінде өткен Азия чемпионатында күміс жүлде алған қазақ боксшысы Абылайхан Жүсіповне қатысты жаңа ақпарат шықты, деп хабарлайды Jastar janary.
Спорт журналисі Аслан Қаженовтың Фейсбук парақшасында жазған мәліметінше, Қазақстан бокс федерациясы 11 желтоқсан күні Чианг Мэйде (Таиланд) өткен Азия чемпионатының ерлер арасында 71 келі салмақ дәрежесіндегі финал бойынша IBA және ASBC ұйымдарына наразылық хат жолдады.
Ресми хабарламада Абылайхан Жүсіпов пен Хавасбек Асадуллаев жекпе жегінде өзбекстандық боксшы тарапынан спорттық ереже өрескел түрде бұзылғаны айтылады. Шаршы алаңдағы төреші Джована Угренович (Сербия) бұл сәтте ешқандай ескерту жасамағаны да сөз етіледі. Ал, Қазақстан тарапында ереже бұзылуына дәлел ретінде фото және видео материалдар да бар.
Нәтижесінде, IBA және ASBC ұйымдары осы салмақтағы ақтық сынды қайта қарастырып, келесі шешімге келді. 71 келіде Абылайхан Жүсіпов Азия чемпионы деп танылды, ал өзбекстандық боксшы белгілі мерзімге жарыстардан шеттетіледі.
– Алтын саны жағынан Қазақстан мен Өзбекстан теңесті. Жалпы есепте екі елде 10 алтыннан бар. Бұл жағдай үміт отын қайта жаққандай болды. Қазақ бокс мектебі бар. Бола да береді. Ең бастысы, қарсыластар тарапынан әлгіндей қастандықтар және төрешілер тарапынан әлгіндей әділетсіздіктер болмаса, қазақ балалары әлі талай биікті бағындырады. Жарайсың, Абылайхан! Жарайсыңдар, жігіттер! – деп жазды А.Қаженов.
