«Қайратқа» тарихи жеңіс сыйлаған Темірлан! (видео)

Кеше Алматыдағы Орталық стадионда жергілікті «Қайрат» УЕФА чемпиондар лигасының плей-офф кезеңінде шотландияның Селтигімен кездесті. 

Фото: sports.kz

Алғашқы матчта тең нәтиже тіркелсе, қарымта ойында тағы да тең түсті. Ал пенальти сериясында «Қайрат» қақпашысы 21 жастағы Темірлан Анарбеков қарсыластың 3 соққысын қайтарып, жеңісті жұлып алды.

Мачт қаһарманы Темірлан Анарбеков   

Футболдың ұлы сәттері тек шабуылшылардың соққан голдарымен ғана өлшенбейді. Кейде бір қақпашының ерлігі күллі клубтың тағдырын өзгертіп жатады. Кешегі мачта да солай болды. «Қайраттың» қақпашысы Темірланды Чемпиондар лигасының ресми аккаунты да матчтың ең үздік ойыншысы ретінде таңдады.

Темірлан 14 қазанда 22 жасқа толады. Атырау қаласынан.Фото: t.me/tengri_kz

Темірлан Анарбекұлы Анарбеков – қазақстандық футболшы, қақпашы. 2003 жылы 14 қазанда Атырау қаласында дүниеге келген. Қазіргі таңда Алматының «Қайрат» футбол клубының және Қазақстан ұлттық құрамасының ойыншысы.

Темірлан футболға ерте жастан қызығып, алғашқы қадамдарын туған қаласындағы «Атырау» клубының жасөспірімдер жүйесінде жасады. 2017 жылы елдің ең беделді клубтарының бірі «Қайраттың» академиясына ауысты. Дәл осы жерде ол кәсіби футболшы ретінде қалыптасты.

Спорттағы мансабы

Темірлан 2020 жылы 17 жасында Қазақстан Премьер-лигасында дебют жасады. 30 қараша күні «Таразға» қарсы матчта алаңға шығып, алғашқы тәжірибесін жинады. Кейін ол «Қайрат-Жастар» сапында негізгі тәжірибесін толықтырды. 2024 жылы уақытша «Жеңіс» командасында өнер көрсетіп, 14 матчта қақпаны қорғады.

Қазіргі таңда «Қайраттың» негізгі құрамында өнер көрсетіп, команданың сенімді қақпашыларының бірі саналады.

Ұлттық құрамадағы жетістіктері

Анарбеков жасөспірімдер құрамасынан бастап Қазақстан намысын қорғап келеді:

• 2019 жылы – Қазақстан U-17;
• 2021 жылы – Қазақстан U-19;
• 2022–2024 жылдары – Қазақстан U-21 құрамасында ойнады.

2025 жылдан бастап ол Қазақстан ұлттық құрамасына шақырылып, ірі халықаралық матчтарда ел намысын қорғауда.

Жетістіктері

• Қазақстан чемпионы: 2020 («Қайрат»)
• Қазақстан біріншілігінің қола жүлдегері: 2021

Қызықты деректер

Бойы – 189 см, ойын мәнері сенімділік пен реакция жылдамдығымен ерекшеленеді.

Жас та болса, Чемпиондар лигасы мен халықаралық ареналарда көзге түсіп үлгерді.

2025 жылы «Қайраттың» Чемпиондар лигасының негізгі кезеңіне шығуына үлкен үлес қосып, пенальти сериясында бірнеше сейв жасады.