Jastar janary Ұлттық, қоғамдық-мәдени ақпараттық порталы
Мемлекет басшысы Қасым-Жомарт Тоқаев құқық қорғау органдарының кеңейтілген алқа мәжілісінде сөз сөйледі.Президент мемлекетке қызмет ету – ең құрметті әрі аса жауапты міндет екенін айтты.
Мемлекет басшысы құқық қорғау органдарының кеңейтілген алқа мәжілісінде полиция қызметкерлері мен мемлекеттік қызметшілерді кәсіби мейрамдарымен құттықтады. Қасым-Жомарт Тоқаев Күштік құрылымдарды жаңғырту ісінде жаңа буынның атқаратын рөлі ерекше екенін айтты. Сондықтан бүгінгі басқосуға академиялардың курсанттары да арнайы шақырылған
«Қазір дүниежүзі алмағайып, бұлыңғыр, яғни, өте күрделі кезеңді бастан өткеруде. Осындай құбылмалы уақытта қоғамдық қауіпсіздікті сақтау, заңның мүлтіксіз орындалуын қамтамасыз ету – айрықша маңызды міндет», — деді Мемлекет басшысы.
Президент құқық қорғау мекемелерінің жұмысында ешқандай қателік немесе жетіспеушілік жоқ деп айтуға болмайтынын айта келе, бәріміз бір ел, бір халық болып Қазақстанымыз үшін қызмет етіп, табанды жұмыс істеуіміз керектігін алға тартты.
«Бұл – баршамызға ортақ ұлттық парыз, азаматтық борыш. Қазақстан қауіпсіз, заң мен тәртіпке бағынатын ел болуы керек.Сондықтан менің тапсырмам бойынша Президент Әкімшілігі мен Қауіпсіздік Кеңесі бір аптаның ішінде Құқық қорғау органдарының жұмысы туралы арнайы талдау дайындауы керек. Барлық түйткілдерді ашық түрде көрсетеді, мәселелерді шешу жолдарын ұсынады. Бұл – өте маңызды жұмыс, оны жалғастыру қажет. Түптеп келгенде, біздің басты бағдарымыз – айқын. Бұл – заң мен тәртіп қағидаты. Қызметтеріңізге табыс тілеймін!» – деді Мемлекет басшысы.
Сондай-ақ Президент осы аптаны «Заң және тәртіп» апталығын жариялады.
«Осы апта қоғамда заң мен тәртіпті насихаттау аптасы болмақ. Алдағы жеті күн құқықтық мәдениетті нығайтуға, сондай-ақ құқық қорғау органдарының абырой-беделін арттыруға арналуы керек. Алайда, бұл бір реттік акция емес. «Заң және тәртіп» апталығына азаматтардың құқықтық сана-сезімін көтеретін маңызды, жүйелі шара ретінде қараған жөн», – деді Қасым-Жомарт Тоқаев.
