Jastar janary Ұлттық, қоғамдық-мәдени ақпараттық порталы
Отандасымыз, мәнерлеп сырғанау шебері Михаил Шайдоров Бостонда өткен әлем чемпионатында күміс жүлдеге қол жеткізді, деп хабарлайды Jastar janary.
Жарыстың соңғы бағдарламасы – еркін бағдарламада ерлер арасындағы жеке сырғанаушылар өнер көрсетті. Қысқа бағдарлама бойынша Шайдоров үшінші орында тұрды, ал екінші жарыс күні ол нәтижені жақсартып, жоғары көтерілді. Еркін бағдарламада қазақстандық спортшы 192,70 ұпай алды. Осылайша, ол жеке рекордын жаңартты. Сондай-ақ, жалпы есептегі көрсеткішін жаңартып, 287,47 ұпайға қол жеткізді.
Бұл нәтиже 20 жастағы Шайдоровқа әлем чемпионатында алғаш рет күміс медаль жеңіп алуға мүмкіндік берді.
Ол тек америкалық Илья Малининге (318,56) жол берді. Үшінші орынды жапониялық Юма Кагияма (278,19) иеленді.
Осы жетістігінің арқасында Шайдоров 2026 жылғы қысқы Олимпиадаға жолдама алды. Бұған дейін лицензияны әйелдер арасындағы жарыста 14-орын алған Софья Самоделкина да иеленген болатын.
Шайдоров әлем чемпионатының тұғырынан көрінген Қазақстан тарихындағы үшінші мәнерлеп сырғанаушы атанды. Бұған дейін бұл жетістікке Денис Тен (2013 жылы күміс, 2015 жылы қола) және Элизабет Тұрсынбаева (2019 жылы күміс) жеткен еді.
