Jastar janary Ұлттық, қоғамдық-мәдени ақпараттық порталы
Батыс Қазақстан облысының әкімі Нариман Төреғалиев Олимпиада чемпионы Елдос Сметовпен кездесті.
Кездесу барысында Олимпиада чемпионы өңірдегі спорт саласындағы жетістіктермен таныс болды. Облыс әкімі өз кезегінде Елдос Сметовке сәттілік тіледі.
«Олимпиада ойындарында өзіңе барша қазақ елі жанкүйер болды. Әсіресе, жастарымыздың үлгі тұтар спортшысына айналдың. Әрдайым сәттілік серік болсын!» – деп атап өтті Нариман Төреғалиев.
Сондай-ақ Елдос Сметов Батыс Қазақстан облысындағы отбасы үлгісіндегі балалар ауылының жасөспірімдерімен кездесті. Бұл шара Батыс Қазақстан дзюдо федерациясының президенті Рустам Шайхының қолдауымен ұйымдастырылды.
Кездесу барысында олимпиада чемпионы балалармен өзінің спорттық тәжірибесімен бөлісіп, оларды салауатты өмір салтын ұстануға және спортпен шұғылдануға шақырды. Сонымен қатар, балаларға жаңа жылдық сыйлықтар табыстап, олардың сұрақтарына жауап берді. Кездесу соңында жасөспірімдер Елдос Сметовтен қолтаңба алып, онымен естелік суретке түсті.
Бұл іс-шара балаларға үлкен мотивация беріп, олардың спортқа деген қызығушылықтарын арттырды. Елдос Сметовтің балалар ауылына сапары жасөспірімдердің болашақта спортта жетістікке жетуіне ынталандырушы күш болды.
