«Таза Қазақстан»: Елордада жастар коммуналдық сала қызметкерлеріне алғыс білдірді

Елордада қардың мол жаууына байланысты күндіз-түні жұмыс істеп жүрген коммуналдық қызметкерлерге арнап «Таза Қазақстан» экологиялық акциясы аясында мейірімділік іс-шарасы ұйымдастырылды, деп хабарлайды Jastar janary порталы қала әкімдігінің ресми сайтына сілтеме жасап.

Ауа райына байланысты елорданың коммуналдық қызметтері тәулік бойы күшейтілген жұмыс режиміне көшіп, жолдар мен тротуарларды қардан уақытылы тазартуды қамтамасыз етуде. Олардың тынымсыз еңбегін қолдау мақсатында кезекті игі шара ұйымдастырылды. Нұра ауданында коммуналдық қызметкерлерге қолайсыз ауа райында дем беру үшін ыстық тамақ пен тәтті шай таратылды.

Ал Есіл ауданында «Астана жастары» ЖРО соңғы уақытта трендке айналған видеоны қайталап, коммуналдық қызметкерлердің алақанын шоколадқа толтырды.

Бұл кішігірім, бірақ қамқорлық белгісі қала игілігі үшін күнделікті еңбек ететін адамдарды қолдауға бағытталған акциялардың ортақ дәстүріне айналды.

«Біздің жұмысымыз, әсіресе қарлы күндері, оңай емес. Бірақ жұрттың қолдауы мен қамқорлығы қуантатыны сөзсіз», – деп бөлісті «Астана Тазалық» ЖШС қызметкерлерінің бірі.