Jastar janary Ұлттық, қоғамдық-мәдени ақпараттық порталы
Астанадағы «Алау» мұз сарайы айдынында шорт-тректен кезекті ашық чемпионат өтіп жатыр, деп хабарлайды Jastar janary.
9-10 желтоқсан күндері аралығында өтетін бәсекеге Ақтөбе, Ақмола, Қостанай, Қызылорда, СҚО, Қарағанды облыстарынан және Астана қаласынан 211 жас спортшы қатысуда.
«Шорт-тректе Абзал Әжіғалиев, Нұрберген Жұмағазиев, Денис Никиша сынды ерлердің арқасында осы спортымыз танымалдылыққа ие болса, өткен демалыста аруларымыз Бейжіңде өткен World Tour кезеңінде әйелдер эстафетасы сайысында тұңғыш рет жүлде еншіледі. Бұл нәтиде шорт-тректің елімізде қарқынды дамып жатқанын білдіреді. 2023 жылы Astana Open жарысында 167 спортшы тіркелсе, биыл 211-ге дейін өсті. Турнирге келген облыстардың саны артты. Міне, бұл да айқын дәлел. Осындай сайыстар арқылы баланың бойындағы жігерлік, қайсарлық сынды қасиеттерді байқауға болады. Мінезі бар спортшы түптің-түбінде жетістікке жететін кәсіби спортшыға айналмақ», – деді ҚР Еңбек сіңірген қайраткері, шорт-тректен Астана қаласының аға бапкері Мәдіғали Қарсыбеков.
Жарыста 2011-2017 жылы дүниеге келген спортшылар жас ерекшеліктеріне байланысты 111, 222, 333, 500 метр қашықтарда жүлдеге таласады.
«Бастапқыда мәнерлеп сырғанау секциясына барып, артынша шорт-трекке ауыстым. Шорт-тректің арқасында Шымкент, Алматы, Астана секілді ірі қалаларды көру мүмкіндігіне ие болдым. Спорт карьерамда 8 мәрте чемпион атандым. Осы жолы да бірінші орын алуға ұмтыламын. Спорт арқылы өзге қалалардан жаңа достар таптым. Жақсы әсер алып жатырмын», – деп Қызылорда облысынан келген 8 жастағы Тайыр Мұхамеддинов атты жас қатысушы эмоциясымен бөлісті.
Жеңімпаздар әр жас тобындағы және әр қашықтық бойынша жеке біріншіліктерде анықталады.
