Jastar janary Ұлттық, қоғамдық-мәдени ақпараттық порталы
17 қарашада «Отандастар қоры» КеАҚ президенті Д.Қадыров Ташкент қаласында Республикалық қазақ мәдени орталығының өкілдерімен кездесті.
Кездесуді ашқан Қазақ мәдени орталығының төрағасы С.Үсенов Орталықтың атқарып жатқан мәдени, білім жобаларының орындалу барысы туралы ақпарат беріп, «Отандастар қоры» тарапынан көрсетіліп жатқан игі қолдауларына алғысын білдірді.
Кездесуге қатысқан Ташкент облысының Шыршық, Бостандық, Ташкент қалалық аудандарының және Науаи облысы қазақ мәдени орталықтарының өкілдері екі ел арасында соңғы жылдары қалыптасқан, достық, стратегиялық қарым-қатынастардың нығайғанын атап өтіп, мектеп оқушыларына білім беру, қазақ тілі мен әдебиет оқулықтары мен әдістемелік кітаптарды, Қазақстандағы қазақ газет-журналдарды Өзбекстанға жеткізу мәселелері туралы өз ой-пікірлерімен бөлісті.
«Отандастар қоры» президенті Д.Қадыров өз сөзінде Қоғамның биыл атқарып жатқан іс-шаралары, жобалары туралы айтып, алдағы жылдары өткізілетін жұмыстар жөнінде ақпаратпен таныстырды.
Кездесу соңында Қоғам басшысы шетелдегі қазақ диаспора жастары арасындағы «Қалам мен қиял» шығармашылық байқау жобасының жеңімпазы Науаи облысының Үшқұдық ауданына қарасты 9-мектептің, 9 сынып оқушысы Мақбира Қалыбековаға арнайы сыйлық, диплом және Қазақстанда жазда өтетін халықаралық этнолагерге жолдама тапсырды.
Отандастар қорының баспасөз қызметі
