Астанада Наурыз мейрамы тойланды

Ұлыстың ұлы күні халқымыз үшін ұлық мереке. Күн мен түн теңеліп, шартарап қайта жаңаратын сәт келіп жетті. Жылдан жылға ақырындап өткенімізді түгендеп, ұмытқанымызды қалпына келтіріп жатырмыз. Солардың қатарында Әз-Наурызды тойлаудың онкүндік «Наурызнамасын» айтуға болады.

Бүгін Астанада дәстүрлі түрде Наурыз мейрамы атап өтілді. «Expo» көрме орталығындағы этноауылда өткен іс-шараға президент қатысып, қазақ халқын мерекемен құттықтап, жылы лебізін жеткізді.

«Ұлыстың ұлы күні – ұлтымыздың ұлық мейрамы. Бұл – біздің ата дәстүріміз. Шуақты көктем мерекесінде бүкіл дүние қайта жаңғырады. Күн мен түн теңеледі. Қазақ елі әз-Наурызды көне заманнан бері тойлап келеді. Наурыз – ең алдымен, игілікті істердің мерекесі. Осы күндері әр үйде ақ дастархан жайылады. Ел-жұрт бір-бірімен қауышып, ақ тілегін айтады. Мұқтаж жандарға қайырымдылық жасап, қамқорлық көрсетеді. Ұлыстың ұлы күні биыл да қасиетті Ораза айымен тұспа-тұс келіп отыр. Еліміз үшін мұның мән-маңызы зор. Себебі біздің дініміз бен дәстүріміз – егіз. Қос қазынамыз халқымыздың бірегей болмысын айшықтай түседі», – деді президент Тоқаев.

Президент Наурыз мерекесі былтырдан бастап жаңа тұжырымдамаға сәйкес он күн бойы аталып өтетініне назар аударып, Наурызнаманың әр күні тағылымға толы екенін айтты.

– Наурыз – көптеген шығыс халықтарына ортақ мереке болғанымен, елімізде Ұлыстың ұлы күнін тойлаудың ерекше дәстүрі бар. Бұл мейрамның төл мәдениетіміздегі орны айрықша. Шетелдік меймандар да мереке қарсаңында Қазақстанға арнайы келіп, біздің салт-дәстүрімізбен танысады, әдет-ғұрпымызды танып-біледі. Біз осы рухани қазынамызды жан-жақты дәріптеуіміз керек. Наурызнама бойынша бүгін – Ынтымақ күні. Еліміз үшін ауызбіршілік пен татулықтың орны қашанда ерекше. Бүкіл халқымыз ұлтына, дініне қарамастан бір ел болып, Наурызды бірге атап өтеді. Біз осындай береке-бірлігіміздің арқасында болашаққа зор сеніммен қарап, тек алға қарай қадам басып келеміз. Жан-жақты реформа жасап, мемлекеттің саяси жүйесін жаңғыртып жатырмыз. Ауқымды экономикалық жобаларды қолға алдық. Байсалды сыртқы саясатымыздың арқасында Қазақстан бүкіл әлемге беделді мемлекет ретінде танымал болды, – деді Мемлекет басшысы.

Былтыр «Наурызнама» қабылданғанда «бұ қалай болар екен» деп қалған сәттер болды. Әсіресе аймақтар қалай атап өту керектігінде бас қатырып жатты. Алайда биыл біраз дүние өзгерген сияқты. Әр күнді өзінің атауы мен мағынасына сай атап өтуде. «Ұлттық киім күні» болды. «Ұлттық спорт күні» өтті. «Ұлттық мәдениет пен салт-дәстүр күні» бар. Яғни, қазақ ұлтына тән, қазақ ұлтының рухани қазынасын ұмытпау, дәріптеу тұрғысынан алғанда «Наурызнама» игі бастама деуге болады.

Қасым-Жомарт Тоқаев этноауылдағы қолөнер жәрмеңкесін аралап көрді.

Биыл көрмеге отандық қолөнершілермен қатар Қытай, Ресей, Әзербайжан, Қырғызстан, Өзбекстан, Түрікменстан, Түркия, Иран, Тәжікстан елдерінен шеберлер шақырылған.

Президентке ұлттық ойындар, қазақстандық дизайнерлер мен танымал брендтердің ұлттық киім үлгілері таныстырылды.