Jastar janary Ұлттық, қоғамдық-мәдени ақпараттық порталы
Елордада «AMANAT» партиясының «Жастар Рухы» жастар қанаты үздік волонтерлер мен белсенділерді марапаттады. Республикалық «Рухтастар» жастар сыйлығы осымен үшінші жыл қоғамдық қызмет атқарған, жастар саясатын дамытуға үлес қосқан жастарға табысталып отыр. Шараға Мәжіліс депутаттары, қоғам қайраткерлері мен жастар көшбасшылары қатысты.
Ел Президенті Қасым-Жомарт Тоқаев «AMANAT» партиясы жастар қанатының кезектен тыс VI съезінде Жаңа Қазақстанның жастары айрықша түсінуге тиіс үш маңызды бағытты, яғни терең білім, еңбекқорлық және отаншылдық қасиет жастардың бойынан табылуға тиіс екенін атап өткен болатын. Сондай-ақ жастар адал еңбекті бағалап, рухы биік, санасы сергек болуға тиіс екенін, жаңа заманның жақсы қасиеттерін бойға сіңіре отырып, жаһанданудың жағымсыз әсерлерін де естен шығармау керектігін, мемлекеттік мүдде бәрінен биік тұруы керек екенін айта келіп, әркім қоғам алдындағы жауапкершілігін терең сезіну керегін, туған елге құрмет жалынды сөзден емес, жасампаз істен көрінетінін, алдына мақсат қойған азамат нағыз мемлекетшіл тұлғаға айналатынын ерекше атап өтті.
Міне, Президенттің осы сөзін басшылыққа ала отырып, білімді, білікті әрі белсенді, алда болуға ұмтылған жастар аз емес. Сондай үздік жастарға қолдау көрсету мақсатында бастау алған «Рухтастар» жастар сыйлығы биыл да жалғасын тапты. Салтанатты шарада сөз сөйлеген «AMANAT» партиясының Атқарушы хатшысы Дәулет Кәрібек елде жастарды қолдауға, олардың әлеуетін ашуға, кәсіби өсуіне жағдай жасауға және білім сапасын арттыруға бағытталған жүйелі жұмыстар жүзеге асырылып жатқанын атап өтті.
«Әділетті Қазақстан білімді әрі еңбекқор жастардың күшімен құрылады. Сондықтан Президент Қасым-Жомарт Тоқаев әр Жолдауында жастарға ерекше назар аударады. «AMANAT» партиясы жастарға әрдайым қолдау көрсетіп, олардың еңбегін бағалайды. Біздің жастарымыз мақтануға тұрарлық! Ел үшін қиын-қыстау кезеңдерде – пандемия, өрт, су тасқындары кезінде дәл осы жанашыр жас патриоттар алдыңғы шепте болып, халыққа көмек көрсетті. Ең прогрессивті идеялар, инновациялық шешімдер мен креативті жобалар біздің партия белсенділеріміздің қолынан шығады. «Рухтастар» – бұл Қазақстанның дамуына зор үлес қосып жүрген жас көшбасшылар қауымдастығы», – деді Дәулет Кәрібек.
Сонымен қатар «Рухтастар» сыйлығы өздерін дәлелдеген белсенділер мен волонтерлерді ынталандырып қана қоймай, олардың үлгісін өзге жастарға көрсетіп, жаңа жетістіктерге шабыттандырады және ортақ мақсаттарға біріктіреді.
«Рухтастар» сыйлығы – бұл жай ғана марапат емес. Бұл – болашақтың жарқын болуын армандап қана қоймай, сол үшін күнделікті еңбек етіп жүрген жастарға алғыс білдіру мүмкіндігі. Әр жеңімпаз – қайсарлықтың, табандылықтың және айналасындағы әлемді жақсы жағына өзгертуге деген шынайы ұмтылыстың үлгісі. Мұндай жастар кез келген жағдайда – су тасқынынан зардап шеккендерге көмек көрсетуде болсын немесе инновациялық жобаларды жүзеге асыруда болсын, көшбасшы болуға және қоғамға қолдау көрсетуге дайын. Бұл сыйлық бізді ортақ мақсат – Әділетті Қазақстанды құру жолында бірігуге шабыттандырады», – деді «Жастар Рухы» жастар қанатының төрағасы Акерке Искандерова.
Биыл байқауға 18 бен 35 жас аралығындағы жастардан 500-ге жуық өтінім түсті. Іріктеуден өтіп, жеңімпаз танылған жастарға дипломдар, статуэткалар мен арнайы сыйлықтар табыс етілді.
«Нұрлы ақыл» үздік жас ғалым аталымына ғылыми ізденістерін жетілдіру үшін Алматы облысы әкімінің грантын ұтып, зертханасын ашқан Мағжан Ысқақов лайық деп танылды. Ол өзінің ғылыми еңбегінде арнайы пластик ыдыстардың үстіне гидропоникалық әдіспен дәнді дақылдарды өсіріп, жоғары өнімділікке қол жеткізген.
«Қайсар» жыл батыры номинациясымен Астана қаласы 24-ші мамандандырылған өрт сөндіру бөлімінің бөлімше командирі Елдар Қанафиянов марапатталды. Ол биыл Қостанай облысы Тобыл қаласында су тасқыны кезінде эвакуация және құтқару жұмыстарын ұйымдастырды. Кейін Батыс Қазақстан облысына көмекке барып, тұрғындарды және үй жануарларын құтқару жұмыстарын жүргізді.
«У.Қантаева атындағы Мойнақ СЭС» АҚ өндірістік-техникалық бөлімінде режимдік мәселелер бойынша инженері Сұлтан Әукен автоматтандыру және цифрландыру жобаларын әзірлегені үшін «Ыстық қайрат» еңбек адамы марапатын алды.
«Жылы жүрек» жыл еріктісі атағына Қостанай өңірлік университетінің 3-курс студенті Есімхан Әмірғалиев пен М.Өтемісов атындағы Батыс Қазақстан университетінің 4-курс студенті Дархан Қуатов лайық деп танылды.
«Жылдың әлеуметтік жобасы» номинациясында «CERO.KZ» жобасының авторы Ясса Танир жеңімпаз атанды. Оның жобасы қоршаған ортаның жағдайын бақылау үшін экологиялық патрульдер құруды, қалдықтарды қабылдау және қайта өңдеу пункттерін ашуды, сондай-ақ табиғатты қорғауға бағытталған басқа да шараларды қамтиды.
Ал «Белсенді рухтас» жыл белсендісі номинациясы бойынша әр аймақтық филиалдан 20 белсенді жас марапатталды.
Сонымен қатар «Жастар Рухы» жастар қанатының ең үздік бөлімшесі ретінде Л.Гумилев атындағы Еуразия ұлттық университеті мен Қызылорда қаласындағы бөлімшелер танылса, Түркістан және Қарағанды облыстарындағы жастар қанатының филиалдары «Үздік филиал» атанды.
Әсем Алтынбекқызы
