Jastar janary Ұлттық, қоғамдық-мәдени ақпараттық порталы
С.Аманжолов атындағы Шығыс Қазақстан университетінде «Мамандығым – болашағым» өңірлік жобалық кеңсесінің салтанатты ашылу рәсімі өтті.
«Мамандығым – болашағым» жобасы өңірдегі еңбек нарығындағы өзгерістерді болжау және студенттерге ерте кәсіптік бағдар беру мақсатында Қазақстан Республикасы Үкіметінің қаулысымен қабылданған «Халық табысын арттырудың 2029 жылға дейінгі бағдарламасы» аясында жүзеге асырылуда. Жобаның негізгі мақсаты – аймақтағы еңбек нарығындағы өзгерістерді болжау және студенттерге ерте кәсіптік бағдар беру. Кеңсенің салтанатты тұсаукесерінде Қазақстан Республикасы Ғылым және жоғары білім министрі Саясат Нұрбек бейнебайланыс арқылы шығып, сәттілік тіледі.
– Бүгінгі таңда кәсіптік-техникалық білім беру жүйесін кадрлық қажеттіліктерге неғұрлым нақты бағдарлау үшін кадрларға сұранысты ерте болжау және жұмыс берушілермен берік диалог құру өте маңызды. Сонымен қатар, жастарды ғылым мен интернационалдандыруға баулу, сондай-ақ цифрлық экожүйені қалыптастыру қажет, — деді Саясат Нұрбек.
«Мамандығым – болашағым» жобасы аясында университет қызметкерлері форсайтты зерттеу әдістемесі бойынша 5 күндік қарқынды сертификаттау курсынан өтеді және аймақтық жобалық кеңсенің командасына қосылады. Олар алдағы уақытта өңірдегі негізгі сала мамандарының қатысуымен Шығыс Қазақстан облысындағы кадр қажеттілігінің өңірлік картасын жасауға бағытталған форсайттық зерттеу жүргізбек.
Қазір еліміздің 15 өңірінде «Мамандығым – болашағым» жобасы жүзеге асырылуда. Павлодар, Маңғыстау, Қарағанды облыстарында, Алматы және Астана қалаларында кадрларға қойылатын талаптардың өңірлік карталарын әзірлеу аяқталып, осы өңірлердің басым секторларының арасында келешегі бар кәсіптер анықталды. Сондай-ақ студенттердің кәсіби диагностикасы жүргізілді, оның нәтижелері бойынша студенттер өздерінің бейіні мен кәсіптік қызмет мүмкіндіктерін анықтады.
